فيات ولادا موديلات تمانين
توكتوك وعجلة مكسرين
ناس وماشية م الفقر تايهة
م الجوع شايفهم .. سكرانين
ع القهوة ناس زحمة وكياس
وعامل ماشي شايله فاس
شباب يزعق يضحك يجعر
وواحد يزقه يطلع ينعر
اخلاق زبالة مع انه عالة
ابوه بيصرف وهو يغرف
ع البنات وماشي يضحك يغلس
تقوله عيب عليك يألس
ست وماشية شايلة الخضار
وراجل بينده راكب حمار
بياع يشدك تعالي عندي
بالعافية تاخد كيلو سفندي
ياعم وسع اوعي يا افندي
طابور وواقف ع الفرن شايف
عيش لا ينفع طري وناشف
وطفل يبكي يا ناس ده تايه
راجل كبير يطبطب عليه
يبوسه ويمسح دمعة عنيه
وست تجري وسط الزحام
ابني ياناس ده تاه قدام
ودمعة الفرحة ع الخد تجري
تشكر الراجل ولاهله تدعي
اخوك جعان ع الرصيف
وانت واقف معاك رغيف
تروح وتقسم قلبك نضيف
بياع بليلة م القدرة يغرف
تبص وتمشي معكش تصرف
فلاح ف سوق علي رجله ماشي
دخل الزحمة ومعاه مواشي
بقرة كبيرة داست عليا
ياعم ابعد هناك شوية
بعيد وبان طريق زراعي
جريت وازق رافع دراعي
طلعت حي طلعت شايف
دي مصر سوق والكل عارف
فقر وجهل سنين طويله
ناس غلابة وفلوس قليلة
نفوس وحلوة ونفوس غريبة
تدوس عليك تقولش ديبة
وناس هناك بعيد بتضحك
ترسملك الحزن وتاخده بطيبة
اه يا كفرة خدتو خيري
وبدل شعبي خدو غيري
No comments:
Post a Comment